دھونس سے میڈیا کو دبانے والو کو تاریخ یاد رکھنی چاہئے، بلاول بھٹو زرداری

صحافیوں کو گالیاں دینے کے ٹرینڈز حکومت کے ناقدین کو خاموش کرانے کے لیے ایک اور حملہ ہے، چیئرمین پیپلزپارٹی

 

کراچی( اخبارتازہ ترین - 02 اپریل2020ء)

پاکستان پیپلز پارٹی کے چیئرمین بلاول بھٹو زرداری نے کہا ہے کہ جو سمجھتے ہیں کہ دھونس سے میڈیا کو دبایا جا سکتا ہے انہیں تاریخ یاد رکھنی چاہیے۔جمعرات کو جاری اپنے بیان میں پیپلزپارٹی کے چیئرمین بلاول بھٹو زرداری نے نامور صحافیوں کو سوشل میڈیا پر گالیاں دینے اور نشانہ بنانے کی مہم کی مذمت کی ہے۔انہوں نے کہاکہ صحافیوں کو گالیاں دینے کے ٹرینڈز حکومت کے ناقدین کو خاموش کرانے کے لیے ایک اور حملہ ہے۔

انہوں نے کہا کہ گالیاں دے کر صحافیوں کو پیغام دیا جا رہا ہے کہ یا تو وہ خاموش رہیں یا خمیازہ بھگتنے کے لیے تیار رہیں،حکومت اور تحریکِ انصاف مخالف آوازوں کی ٹرولنگ کے بجائے کورونا پر توجہ دیں۔بلاول بھٹو زرداری نے کہا کہ اتنی محنت کورونا پر بیداری کے لیے کی جائے تو وقت اور وسائل کا درست استعمال ہوگا، ان غیر معمولی حالات میں ملک کو اتحاد کی ضرورت ہے۔

 

انہوں نے کہا کہ کورونا وائرس کے بدترین چیلنج سے نمٹنے کے لیے ہمیں یکجا ہونے کی ضرورت ہے، ہم اس نازک موڑ پر فروعی سیاست اور سیاسی الزام تراشی کے متحمل نہیں ہو سکتے۔چیئرمین پیپلزپارٹی نے کہا کہ جمہوری نظام میں میڈیا اہم کردار ادا کرتا ہے،

 انسانی تاریخ کے اس بدترین بحران میں میڈیا نے دنیا بھر میں حکومتوں کو ان کے اقدامات پر جواب دہ ٹھہرایا ہے۔انہوں نے کہا کہ جو سمجھتے ہیں کہ دھونس سے میڈیا کو دبایا جا سکتا ہے انہیں تاریخ یاد رکھنی چاہئیے، یاد رکھیں کہ پاکستان کے صحافیوں کی ناانصافی اور ظلم کے خلاف جدوجہد کی ایک لمبی تاریخ ہے۔