کورونا سے نمٹنے کیلئے قوم کا تعاون سب سے اہم ہے، ترجمان پاک فوج

عوام گھروں تک محدود رہ کرکورونا کو شکست دے سکتے ہیں، دعا ہےکہ اللہ پاک کورونا وائرس سے نجات دلائے۔ ڈی جی آئی ایس پی آر میجر جنرل بابر افتخار

راولپنڈی ( اخبارتازہ ترین۔ 03 اپریل 2020ء)

پاک فوج کے ترجمان میجر جنرل بابر افتخار نے کہا ہے کہ کورونا سے نمٹنے کیلئے قوم کا تعاون سب سے اہم ہے، عوام گھروں تک محدود رہ کرکورونا کو شکست دے سکتے ہیں، دعا ہےکہ اللہ پاک کورونا وائرس سے نجات دلائے۔

 انہوں نے معاون خصوصی اطلاعات فردوس عاشق اعوان کے ہمراہ پریس کانفرنس کرتے ہوئے کہا کہ دعا ہے کہ اللہ پاک کورونا وائرس سے نجات دلائے۔ تین ماہ سے دنیا کورونا وائرس کی لپیٹ میں ہے۔ اس وباء نے عالمی ماحول کو یکسر تبدیل کردیا ہے۔ 

انہوں نے کہا کہ پاکستان بھر کے علماء کرام کا بھی شکریہ ادا کرتے ہیں۔ ڈاکٹرز، پیرامیڈیکل اسٹاف اور سیکیورٹی اداروں کو خراج تحسین پیش کرتے ہیں۔ بابر افتخار نے کہا کہ رنگ ونسل سے بالاتر ہوکرایک قوم بن کراس وباء کا مقابلہ کرنا ہے۔

 

کورونا کے خلاف جنگ جیتنے کیلئے میڈیا کا بھرپور تعاون درکار ہے۔

انہوں نے کہا کہ صوبائی حکومتوں کو بھرپورتعاون فراہم کررہے ہیں۔ افواج پاکستان ملک کے کونے کونے میں موجود ہیں۔ تمام وسائل کو بروئےکار لا کراقدامات کئے جا رہے ہیں۔ 

عوام گھروں تک محدود رہ کرکورونا کو شکست دے سکتے ہیں۔ انہوں نے کہا کہ نیشنل کمانڈ اینڈ آپریشن سینٹرون ونڈو آپریشن سینٹر ہے۔ نیشنل کمانڈ اینڈ آپریشن سینٹر کے ذریعے تمام صوبوں کی اطلاعات اور معلومات کو اکٹھا کرکے این سی سی کو پیش کیا جاتا ہے 

تاکہ ملکی قیادت نظام مرتب کرسکے۔ اسی مربوط نظام کے تحت اب تک لاکھوں افراد کو ٹریک اینڈ ٹریس کرکے بروقت ہدایات پہنچائی جاچکی ہیں۔ پی ٹی اے کے ذریعے 465 ملین پیغامات عوام تک پہنچائے جا چکے ہیں۔

 بہت ساری جگہوں پر علاقوں کو آئسولیٹ بھی کیا جارہا ہے۔انہوں نے کہا کہ ہم غیرمعینہ مدت تک لاک ڈاؤن جاری نہیں رکھ سکتے، اس کے ساتھ ساتھ ہمیں بنیادی ضروریات زندگی کی ترسیل بھی جاری رکھنا پڑے گی۔